Eg haldi, at tað er av stórum týdningi, at vit sum politikkarar seta okkum inn í viðurskiftini, sum vit skulu umrøða og sum summir av okkum verða valdir til at lóggeva um.

Dagstovnaøkið er eitt øki, sum eg vil arbeiða fyri. Allar kanningar vísa, at dagligi trivnaðurin hjá børnum hevur alt at siga fyri teirra menning.

Mánadagin hevði eg eitt prát við Jógvan Philbrow, formann í pedagogfelagnum. Hann umboðar størsta partinum av starvsfólkunum á dagstovnaøkinum. Eg spurdi hann, hvat ítøkiliga kundi betrast ella broytast, ikki bert peningaliga, men eisini reint strukturelt.

Sum eg skilti á okkara práti eru tað lønarviðuskiftini, ið fylla nógv. Hetta økið kann vera nokkso tungt at fara í holt við, tí tað eru so nógvir ymiskir áhugabólkar. Tá hann varð spurdur um, hvat átti at verið gjørt skjótast gjørligt, vóru hesu fýra ovaliga á listanum :

​

1. Loysa námsfrøðingin frá praktiskum uppgávum

2. Gera ein standard (minimums normeringar)

3. Gera útbúgvingar meiri atkomligar

4. Lønarviðurskiftini

​

Jógvan Philbrow útgreinar hesi 4 økini nærri her:

​

1. Loysa námsfrøðingin frá praktiskum uppgávum

Kanningar vísa, at praktiskar uppgávur, sum t.d. at taka av borðinum, rudda, koyra í uppvaksimaskinuna, o.s.fr. fyllir rættliga nógv í gerandisdegnum hjá einum námsfrøðingi. Hetta tekur tíð frá børnunum og ger tað trupult hjá teimum at gjøgnumføra sína uppgávu, sum er at menna børnini. Ein námsfrøðingur skal kunna hava tíð at brúka síni evni saman við teimum, sum eru á stovninum, uttan at vera avbrotin av øðrum gerðumálum allatíðina. Hettar ger, at námsfrøðingurin hevur tað torført at fullføra uppgávuna, hann er settur til frá frystu stund av. Hettar kann betrast við at t.d. játta køkshjálp til stovnar, dagligir hjálparir til tær ymsu praktisku uppgávurnar o.s.fr.

​

2. Gera ein standard (minimums normeringar)

Gera lóggávu, sum lýsir neyvt, hvat tað minsta er, ein stovnur skal hava (minimums normeringar). Sum nú er á dagstovna økinum, er tað sera ólíkt frá tilboði til tilboði, hvar teir ymisku stovnarnir veita, t.d eru matpakkaskipanir, hjálp, fruktskipanir og hvørjar vørur foreldrini skulu lata við barninum ikki tann sama frá stovn til stovn. Hetta kann føra við sær, at námsfrøðingar flyta til teir stovnar, har viðurskiftini eru best. Nógv flyting og mistrivnaður er ikki sunt fyri børn á stovni, tí tey fáa ikki tann neyva tryggleikan, sum er so umráðandi í barnaárunum.

Ein standard kann bøta uppá støðuna, tí tað ger, at starvsfólk ikki líka týtt flyta frá stað til stað fyri at finna bestu umstøður, alt eftir hvørjar veitingar stovnurin hevur. Hettar skuldi javnsett arbeiðsplássini í ein vissan mun og hjálpt við at gera arbeiðs umstøður líka frá stað til stað.

​

3. Gera útbúgvingar meiri atkomiligar

Gera tað lættari at fáa útbúgving innan økið við t.d við at taka lívsviðurskiftir og arbeiðsroyndir við í roknistykkið, tá farið verður undir útbúgving. Hettar ger at summi, ið hava fleiri ár av arbeiðsroyndum innan økið sum ófaklærd kunnu spyrja um meritt og taka útbúgvingina uppá styttri tíð. Hettar hevur verið uppi at vent nakrar ferð fyrr og burdi verið tikið upp aftur av álvara, tí hettar kann hjálpa at fáa fleiri starvfólk á einum økið, sum veruliga vantar tey.

​

4. Lønarviðurskiftini

Pedagogfelagið ynskir at fáa lønarstigan endurskoðaðan. Av tí at dagstovnaøkið verður stýrt av kommununum, vil eg ikki koma inn á hetta økið. Hetta meti eg, hoyrir heima í kommunalpolitikki, ikki landspolitikki, sum býtið er.